پنجاب میں جنگلی حیات کے تحفظ کے مثبت نتائج، اڑیال کی آبادی مستحکم ہونے لگی

وزیراعلیٰ پنجاب مریم نواز شریف نے خوشخبری سنائی ہے کہ تاریخی اُچھالی جھیل پر فلیمنگو (ہنس پرندوں) کی تعداد پچھلے سیزن کے 10 سے بڑھ کر اس بار 60 سے بھی تجاوز کر گئی ہے، جبکہ ان حسین پرندوں نے اب مظفرگڑھ کے مختلف علاقوں کا بھی رخ کرنا شروع کر دیا ہے۔

سماجی رابطے کی ویب سائٹ ’ایکس‘ پر وزیراعلیٰ پنجاب نے اُچھالی جھیل پر فلیمنگو اور سالٹ رینج میں نایاب اڑیال کے جھنڈ کی دلکش تصاویر بھی شیئر کی ہیں۔ مریم نواز شریف کا کہنا تھا کہ فلیمنگو کی تعداد میں یہ شاندار اضافہ اور اڑیال کی اپنے قدرتی مسکن میں محفوظ موجودگی اس بات کا واضح ثبوت ہے کہ صوبے میں جنگلی حیات کے تحفظ، موثر قانونی اصلاحات اور قدرتی ماحول کی بحالی کے لیے جو اقدامات کیے گئے ہیں، ان کے مثبت نتائج سامنے آرہے ہیں۔ سالٹ رینج کے ڈپٹی چیف وائلڈ لائف رینجر سید علی عثمان کے مطابق، سخت حفاظتی اقدامات اور قوانین پر سختی سے عمل درآمد کی وجہ سے علاقے میں اڑیال کی آبادی کو مستحکم کرنے میں بڑی مدد مل رہی ہے۔ چکوال کے اسسٹنٹ چیف وائلڈ لائف رینجر مرزا عابد حسین کی رپورٹ کے مطابق بھی پنجاب وائلڈ لائف ایکٹ اور محفوظ علاقوں کے قوانین کا نفاذ نایاب جنگلی حیات کی بقا میں کلیدی کردار ادا کر رہا ہے۔ محکمہ وائلڈ لائف کا کہنا ہے کہ اُچھالی جھیل پر مقامی اور ہجرت کر کے آنے والے فلیمنگو کی موجودگی خطے کے حیاتیاتی تنوع (Biodiversity) کے لیے انتہائی اہمیت کی حامل ہے۔