وزیراعظم کا 2027 کیلئے گندم کی مجوزہ قیمت 4 ہزار 500 روپے فی من مقرر کرنے کا فیصلہ

وزیراعظم محمد شہباز شریف نے ملکی زرعی شعبے کے فروغ اور کسانوں کے مفادات کے تحفظ کے لیے اہم قدم اٹھاتے ہوئے سال 2027 کے لیے گندم کی مجوزہ قیمت 4 ہزار 500 روپے فی من مقرر کرنے کا فیصلہ کیا ہے۔ اس فیصلے کا مقصد بڑھتی ہوئی پیداواری لاگت اور مہنگائی کے تناظر میں کسانوں کو ریلیف دینا اور انہیں گندم کی کاشت کی جانب زیادہ سے زیادہ راغب کرنا ہے۔ اس مشاورتی عمل میں صدر آصف علی زرداری، قائد نواز شریف کے علاوہ وزیراعلیٰ پنجاب مریم نواز اور وزیراعلیٰ سندھ سید مراد علی شاہ کا تعاون بھی شامل رہا، جن کی تجاویز کو سراہا گیا۔ وزیراعظم نے امید ظاہر کی کہ اس اقدام سے گندم کے زیرِ کاشت رقبے اور ملکی پیداوار میں اضافہ ہوگا، جس سے پاکستان غذائی تحفظ کے معاملے میں زیادہ خودکفیل بن سکے گا۔ واضح رہے کہ فی الحال اس قیمت کو اشاراتی یا مجوزہ قرار دیا گیا ہے۔