کرک میں سی ٹی ڈی کا سرچ آپریشن، 2 دہشتگرد ہلاک، ڈی ایس پی سمیت 4 اہلکار شہید

خیبر پختونخوا کے ضلع کرک کے علاقے چرپیرا میں پولیس اور دہشت گردوں کے درمیان شدید فائرنگ کے تبادلے کے نتیجے میں کاؤنٹر ٹیررازم ڈیپارٹمنٹ (CTD) کے ڈی ایس پی عمران الدین خان سمیت 4 پولیس اہلکار شہید ہو گئے، جبکہ پولیس کی شدید جوابی کارروائی میں 2 دہشت گرد ہلاک کر دیے گئے۔

پولیس کے مطابق تھانہ خرم کی حدود میں چرپیرا روڈ پر دہشت گردوں کی ناکہ بندی اور نقل و حرکت کی اطلاع پر ڈی ایس پی بانڈہ اور ڈی ایس پی سی ٹی ڈی کی مشترکہ قیادت میں بڑا سرچ اینڈ اسٹرائیک آپریشن شروع کیا گیا۔ آپریشن کے دوران جب پولیس ٹیم نے دہشت گرد کمانڈر قیصر اقبال کے گھر پر چھاپہ مارا تو اندر سے اندھا دھند فائرنگ کر دی گئی۔

اس فائرنگ کے تبادلے میں ڈی ایس پی سی ٹی ڈی عمران الدین خان، تھانہ لتمبر کے ایس ایچ او سب انسپکٹر افضل اعوان، گن مین کاظم اور بم ڈسپوزل یونٹ (BDU) کے اہلکار امجد نے جامِ شہادت نوش کیا۔ کارروائی میں بم ڈسپوزل اسکواڈ، ڈرون ٹیم اور ریپڈ رسپانس فورس (RRF) کے اہلکار بھی شریک تھے۔ حکام کا کہنا ہے کہ علاقے کو محاصرے میں لے کر آپریشن تاحال جاری ہے تاکہ روپوش عناصر کا مکمل خاتمہ کیا جا سکے۔