میر رضا علی کیس: کمیشن رپورٹ پر عملدرآمد کیلئے سندھ کابینہ کی ذیلی کمیٹی قائم

سندھ کابینہ نے میر رضا علی کی ہلاکت کے واقعے سے متعلق تشکیل دیے گئے جوڈیشل کمیشن کی رپورٹ پر عملدرآمد یقینی بنانے کے لیے ایک اعلیٰ سطح کی کابینہ کی ذیلی کمیٹی قائم کر دی ہے۔

جاری کردہ باضابطہ نوٹیفکیشن کے مطابق صوبائی وزیرِ داخلہ، قانون و پارلیمانی امور اس ذیلی کمیٹی کے کنوینر ہوں گے، جبکہ وزیرِ بلدیات ناصر حسین شاہ اور وزیرِ محنت سعید غنی کمیٹی کے ارکان میں شامل ہیں۔ اس کے علاوہ ایڈووکیٹ جنرل سندھ جواد ڈیرو کمیٹی کو قانونی معاونت فراہم کریں گے اور ایڈیشنل چیف سیکرٹری (داخلہ) سیکرٹریٹ معاونت کے ذمہ دار ہوں گے۔

نوٹیفکیشن کے تحت یہ ذیلی کمیٹی میر رضا علی کی ہلاکت کی تحقیقاتی رپورٹ میں سامنے آنے والے نتائج اور سفارشات پر عملدرآمد کی خود نگرانی کرے گی۔ کمیٹی اپنی تفصیلی سفارشات مرتب کر کے جلد از جلد وزیراعلیٰ سندھ کو پیش کرے گی، جنہیں بعد ازاں سندھ کابینہ کے آئندہ اجلاس میں حتمی منظوری اور عملی اقدامات کے لیے پیش کیا جائے گا۔