حملہ کرکے بچ نکلنے کا دور ختم ہوچکا، جارحیت کا بھرپور جواب دینگے: ایران

ایران نے امریکا کو سخت انتباہ جاری کرتے ہوئے واضح کیا ہے کہ اب “حملہ کر کے بچ نکلنے کا دور ختم ہو چکا” اور کسی بھی امریکی جارحیت کا نہ صرف بھرپور جواب دیا جائے گا بلکہ حملہ آور کا پیچھا بھی کیا جائے گا۔

ایرانی وزارتِ خارجہ کے ترجمان اسماعیل بقائی نے ہفتہ وار پریس بریفنگ کے دوران کہا کہ امریکا کی جانب سے ماضی میں معاہدوں سے انحراف کے باعث شدید اعتماد کا فقدان ہے، تاہم ایران اب بھی برابری کی بنیاد پر اور ٹھوس ضمانتوں کے ساتھ سفارت کاری پر یقین رکھتا ہے۔ انہوں نے بتایا کہ ایران نے قطر کے ذریعے واشنگٹن کو اپنے تحفظات اور شرائط بھیج دی ہیں جن میں تمام محاذوں پر جنگ کا خاتمہ، منجمد ایرانی اثاثوں کی بحالی اور بحری ناکہ بندی کا خاتمہ شامل ہے، لیکن فی الحال امریکی جواب انتہائی ناکافی ہے۔

آبنائے ہرمز کے حوالے سے ترجمان نے بتایا کہ ایران نے اس اہم بین الاقوامی سمندری گزرگاہ کو دوبارہ کھولنے کے لیے ایک 7 روزہ منصوبہ پیش کیا ہے، لیکن اس کی کامیابی کا انحصار امریکی رویے میں لچک پر ہے۔ اسماعیل بقائی نے خلیجی ممالک پر زور دیا کہ وہ اپنی سرزمین ایران کے خلاف استعمال نہ ہونے دیں۔ اسی دوران انہوں نے روسی وزیرِ خارجہ سرگئی لاوروف کے دورۂ تہران کو معمول کی مشاورت قرار دیتے ہوئے واضح کیا کہ اس دورے میں ایٹمی مذاکرات شامل نہیں تھے۔