پوتن اور امریکی حکام کی جلد ملاقات متوقع، روس کا جوہری تخفیف اسلحہ پر مذاکرات بحال کرنے پر زور

کریملن کے ترجمان دمتری پیسکوف (Dmitry Peskov) نے منگل کو صحافیوں سے گفتگو کرتے ہوئے امید ظاہر کی ہے کہ روسی صدر ولادیمیر پوتن اور امریکی مذاکرات کاروں اسٹیو وٹکوف (Steve Witkoff) اور جیرڈ کشنر (Jared Kushner) کے درمیان جلد اہم ملاقات ہوگی۔

ترجمان کریملن نے بتایا کہ ماسکو توقع رکھتا ہے کہ امریکی مذاکرات کار صدر پوتن کو یوکرینی و یورپی حکام سے ہونے والے مشاورتی عمل سے آگاہ کریں گے۔ انہوں نے یوکرین تنازع پر بات کرتے ہوئے کہا کہ روس کے لیے امن مذاکرات میں ایک ایسے بااختیار اور قانونی یوکرینی نمائندے کی شرکت ضروری ہے جو فیصلوں کی ذمہ داری قبول کر سکے۔ اس کے علاوہ دمتری پیسکوف نے خیرسون ریجن کے قصبے الیوشکی میں انسانی بحران کے حل کے لیے پوپ فرانسس اور امریکی صدر ڈونلڈ ٹرمپ کے ساتھ ہونے والے رابطوں کا بھی ذکر کیا اور بتایا کہ دونوں ممالک کے انسانی حقوق کے کمشنرز اس معاملے پر رابطے میں رہیں گے۔

جوہری تخفیفِ اسلحہ اور اسٹریٹجک استحکام کے معاملے پر دمتری پیسکوف نے انتباہ کیا کہ تاریخ میں پہلی بار دنیا اس شعبے میں کسی مؤثر قانونی فریم ورک کے بغیر کھڑی ہے جو کہ ایک انتہائی خطرناک صورتحال ہے۔ انہوں نے امریکا کے ساتھ ان مذاکرات کی فوری بحالی پر زور دیتے ہوئے کہا کہ ان گفتگو میں برطانیہ اور فرانس کی ایٹمی صلاحیتوں کو بھی نظر انداز نہیں کیا جا سکتا۔ عالمی توانائی منڈیوں پر بات کرتے ہوئے کریملن ترجمان نے واضح کیا کہ روس ایک قابلِ اعتماد سپلائر تھا، ہے اور رہے گا، جبکہ آرکٹک خطے کو محاذ آرائی کے بجائے باہمی تعاون کا مرکز ہونا چاہیے۔