ملتان: یتیم بچے کو کار سے کچلنے والا ملزم توقیر نذیر مبینہ پولیس مقابلے میں ہلاک

ملتان میں 15 سالہ یتیم بچے وسیم عباس کو گاڑی سے کچل کر قتل کرنے والا مرکزی ملزم توقیر نذیر کاؤنٹر کرائمز ڈیپارٹمنٹ (CCD) کے ساتھ مبینہ مقابلے کے دوران اپنے ہی ساتھی کی فائرنگ سے ہلاک ہو گیا ہے۔

ڈسٹرکٹ آفیسر سی سی ڈی کے مطابق، ملزم توقیر نذیر نے اپنے تشدد اور غیر انسانی رویے سے تنگ آ کر کام چھوڑنے والے 15 سالہ یتیم بچے کو گاڑی کی ٹکر سے کچل کر ہلاک کر دیا تھا۔ گرفتاری کے بعد جوڈیشل مجسٹریٹ نے ملزم کا 4 روزہ جسمانی ریمانڈ منظور کیا تھا، تاہم وہ پولیس کی تحویل سے فرار ہونے میں کامیاب ہو گیا تھا۔

پولیس حکام کے مطابق بہاولپور کے قریب جب دو مشکوک موٹر سائیکل سواروں کو روکنے کی کوشش کی گئی تو انہوں نے پولیس پر فائرنگ کر دی۔ فائرنگ کے تبادلے کے دوران فرار ہونے والا ملزم توقیر اپنے ہی ساتھی کی گولی لگنے سے ہلاک ہو گیا، جبکہ اس کا دوسرا ساتھی فرار ہو گیا۔ واضح رہے کہ اس دل دہلا دینے والے واقعے پر ملک بھر میں شدید غم و غصے کی لہر دوڑ گئی تھی اور سوشل میڈیا پر ملزم کو کیفرِ کردار تک پہنچانے کا مطالبات کیا جا رہا تھا۔