راؤل کاسترو کے وارنٹ گرفتاری جاری کرنے پر روس کی امریکا پر شدید تنقید

روسی وزارتِ خارجہ نے کیوبا کے 95 سالہ سابق صدر اور معروف ملٹری جنرل راؤل کاسترو (Raúl Castro) کے خلاف امریکی عدالت کی جانب سے وارنٹِ گرفتاری جاری کیے جانے پر سخت برہمی کا اظہار کرتے ہوئے اس اقدام کی شدید الفاظ میں مذمت کی ہے اور اسے ماسکو کے لیے قطعی طور پر ناقابلِ قبول قرار دیا ہے۔

اطلاعات کے مطابق امریکی ریاست فلوریڈا کے شہر میامی کی ایک عدالت نے رواں سال مئی میں عائد کیے گئے فوجداری الزامات کی بنیاد پر راؤل کاسترو کے وارنٹِ گرفتاری جاری کیے ہیں۔ ان پر 1996ء میں کیوبا کی فضائی حدود کے قریب جلاوطن افراد کی تنظیم ‘برادرز ٹو دی ریسکیو’ کے دو امریکی طیاروں کو مار گرانے، چار افراد کے قتل اور امریکی شہریوں کے خلاف سازش کے الزامات شامل ہیں۔ اس مقدمے میں راؤل کاسترو کے علاوہ مزید پانچ افراد کو بھی نامزد کیا گیا ہے۔

روسی وزارتِ خارجہ نے امریکی عدالتی کارروائی کو سیاسی انتقام اور بدمعاشی پر مبنی قرار دیتے ہوئے کہا ہے کہ کیوبا کی تاریخی قیادت کے خلاف اس قسم کا بلاجواز امریکی اقدام بین الاقوامی قوانین اور سفارتی اخلاقیات کی کھلی خلاف ورزی ہے، جس کی روس مکمل مذمت کرتا ہے۔