روس امریکی تجاویز سننے کیلئے تیار، لیکن سیاسی رعایتیں نہیں دیں گے: سرگئی لاوروف

روسی وزیرِ خارجہ سرگئی لاوروف (Sergey Lavrov) نے اعلان کیا ہے کہ ماسکو امریکی صدر ڈونلڈ ٹرمپ کے خصوصی نمائندوں اسٹیو وٹکوف (Steve Witkoff) اور جیرڈ کشنر (Jared Kushner) کی تجاویز سننے کے لیے تیار ہے، تاہم روس اپنے سیاسی موقف میں کسی بھی قسم کی رعایت یا لچک کا مظاہرہ نہیں کرے گا۔

نئے سفارت کاروں سے گفتگو کرتے ہوئے روسی وزیرِ خارجہ نے کہا کہ امریکی صدارتی تاریخ میں نئی انتظامیہ کی جانب سے پیش رو حکومتوں کے فیصلوں کو قبول نہ کرنا ایک روایت بن چکا ہے، اور واشنگٹن اسے سودے بازی کے لیے استعمال کر سکتا ہے۔ لاوروف کے مطابق، اگر امریکی مذاکرات کاروں کی پیش کردہ تجاویز روس کے لیے معاشی اور مالی نقطۂ نظر سے فائدہ مند ہوئیں تو ان پر غور کیا جا سکتا ہے، لیکن اس کے بدلے کوئی سیاسی رعایت نہیں دی جائے گی۔

سرگئی لاوروف نے اس بات پر زور دیا کہ ماسکو کو عالمی سطح پر اپنے تحفظات کے لیے صرف اور صرف اپنی صلاحیتوں اور وسائل پر بھروسہ کرنا ہو گا، کیونکہ بین الاقوامی معاملات میں روس کو ہر لحاظ سے مکمل سازگار ماحول ملنے کی توقع نہیں رکھنی چاہیے۔