مالدیپ کے صدر ڈاکٹر محمد معیزو تین روزہ دورے پر پاکستان پہنچ گئے

مالدیپ کے صدر ڈاکٹر محمد معیزو وزیراعظم شہباز شریف کی خصوصی دعوت پر تین روزہ سرکاری دورے پر منگل کے روز اسلام آباد پہنچ گئے ہیں۔

دفترِ خارجہ کے مطابق اسلام آباد انٹرنیشنل ایئرپورٹ پر وفاقی وزیر برائے بحری امور محمد جنید انور چودھری اور وزیر مملکت برائے وفاقی تعلیم و پیشہ ورانہ تربیت وجیہہ قمر نے معزز مہمان اور ان کے اعلیٰ سطحی وفد کا پرتپاک استقبال کیا۔ اس موقع پر مالدیپ کے صدر کے اعزاز میں 21 توپوں کی سلامی بھی دی گئی۔

یہ 11 سال کے طویل عرصے بعد کسی مالدیپی صدر کا پہلا دورۂ پاکستان ہے، جو دونوں ممالک کے درمیان 1966ء میں قائم ہونے والے سفارتی تعلقات کی 60ویں سالگرہ کے تاریخی موقع پر ہو رہا ہے۔ صدر ڈاکٹر محمد معیزو کے ہمراہ ان کی اہلیہ خاتون اول ساجدہ محمد، کابینہ کے وزراء اور سینئر حکام شامل ہیں۔ بدھ کے روز وزیراعظم ہاؤس میں مالدیپ کے صدر کا باضابطہ اور پروقار استقبال کیا جائے گا جہاں دوطرفہ مذاکرات بھی ہوں گے۔