یمن کی مسلح افواج کے 700 سے زائد حملے، سیکڑوں حوثی جنگجو ہلاک، متعدد زخمی

یمنی مسلح افواج کے ترجمان کرنل ماجد النزیلی نے دعویٰ کیا ہے کہ گزشتہ 24 گھنٹوں کے دوران حوثی باغیوں کے خلاف مختلف محاذوں پر شدید عسکری کارروائیوں کے دوران 744 حملے کیے گئے ہیں۔

فوجی ترجمان کے مطابق ان کارروائیوں کے نتیجے میں 200 حوثی جنگجو ہلاک یا زخمی ہو کر لڑنے کے قابل نہیں رہے، جبکہ دشمن کے استعمال میں آنے والی 90 فوجی گاڑیاں اور دیگر اہم عسکری سازوسامان تباہ یا شدید نقصان سے دوچار ہوا ہے۔ فضائیہ، ڈرون یونٹس، فیلڈ آرٹلری اور اسنائپر یونٹس کی مشترکہ کارروائیوں میں حوثیوں کے کمانڈ اینڈ کنٹرول مراکز، اسلحہ ڈپوز اور رسدی راستوں کو خاص طور پر نشانہ بنایا گیا۔

صوبہ تعز سمیت مشرقی، جنوبی اور مغربی محاذوں پر یمنی فوج کی پیش قدمی تیزی سے جاری ہے جس کے باعث حوثی باغی پسپائی پر مجبور ہو گئے ہیں۔ عسکری حکام نے واضح کیا ہے کہ یہ کارروائیاں انتہائی نپی تلی حکمت عملی کے تحت صرف عسکری اہداف کے خلاف کی جا رہی ہیں تاکہ عام شہریوں اور سول تنصیبات کو محفوظ رکھا جا سکے۔