مالدیپ کے صدر 20 اکتوبر کو پاکستان آئیں گے، کئی معاہدے و مفاہمتی یادداشتیں متوقع

مالدیپ کے صدر ڈاکٹر محمد معیزو وزیراعظم شہباز شریف کی دعوت پر 20 سے 22 اکتوبر تک پاکستان کا تین روزہ سرکاری دورہ کریں گے۔ ترجمان دفترِ خارجہ کے مطابق مالدیپ کے صدر کے ہمراہ خاتونِ اول، کابینہ کے وزرا اور اعلیٰ سطح کا وفد بھی پاکستان آئے گا۔ دورے کے دوران صدر معیزو کی صدر مملکت آصف علی زرداری اور وزیراعظم شہباز شریف کے ساتھ اعلیٰ سطحی اور وفود کی سطح پر ملاقاتیں ہوں گی، جن میں تجارت، سرمایہ کاری، صحت، تعلیم، سیاحت، زراعت اور دفاعی و بحری سلامتی کے شعبوں میں دوطرفہ تعاون کا تفصیلی جائزہ لیا جائے گا۔ ترجمان نے بتایا کہ اس دورے کے موقع پر ’پاکستان مالدیپ بزنس فورم‘ کا انعقاد کیا جائے گا جبکہ مختلف شعبوں میں معاہدوں اور یادداشتوں پر دستخط کی توقع ہے۔ واضح رہے کہ گزشتہ 11 سال کے دوران مالدیپ کے کسی صدر کا پاکستان کا یہ پہلا باضابطہ دورہ ہے۔