پنجاب کابینہ نے صنعتی ترقی اور ایکسپورٹ پروگرام سکیم کے فیچرز کی منظوری دیدی: عظمیٰ بخاری

پنجاب کابینہ نے صوبے میں صنعتی سرگرمیوں کے فروغ، مقامی مصنوعات کی برآمدات اور پبلک ٹرانسپورٹ کو جدید بنانے کے لیے کئی اہم اور تاریخی فیصلے کرتے ہوئے صنعتی ترقی اور ایکسپورٹ پروگرام سکیم اور 1500 نئی بسوں کی خریداری کی منظوری دے دی ہے۔

ڈائریکٹوریٹ جنرل آف پبلک ریلیشنز (DGPR) لاہور میں صوبائی وزیرِ ٹرانسپورٹ بلال اکبر خان کے ہمراہ پریس کانفرنس کرتے ہوئے صوبائی وزیرِ اطلاعات ونشریات عظمیٰ بخاری نے بتایا کہ حکومت پنجاب میں تیار ہونے والی مصنوعات کی برآمدات (Exports) پر خصوصی توجہ دے رہی ہے۔ ان کا کہنا تھا کہ پنجاب میں بننے والی ہر مصنوعات پر فخر سے “میڈ ان پاکستان” لکھا ہونا چاہیے، تاکہ مقامی اشیاء کو عالمی سطح پر پاکستانی شناخت کے ساتھ متعارف کرایا جا سکے۔ اس موقع پر سوشل میڈیا پر بے بنیاد الزام تراشی کے حوالے سے بات کرتے ہوئے عظمیٰ بخاری نے واضح کیا کہ آزادئ اظہارِ رائے کی آڑ میں جتنا مرضی الزام لگانے کی اجازت نہیں دی جائے گی اور بے بنیاد الزام لگانے والے صحافیوں کو قانونی نوٹسز بھیجے جائیں گے۔

دوسری جانب، صوبائی وزیرِ ٹرانسپورٹ بلال اکبر خان نے پبلک ٹرانسپورٹ کے شعبے میں بڑی پیش رفت کا اعلان کرتے ہوئے بتایا کہ اس وقت پنجاب کے مختلف شہروں میں 1100 الیکٹرک بسیں کام کر رہی ہیں، جبکہ وزیراعلیٰ پنجاب مریم نواز نے آج مزید 1500 نئی بسوں کی باضابطہ منظوری دے دی ہے۔ انہوں نے مزید بتایا کہ اس نئے منصوبے کی بدولت رواں سال کے اختتام تک صوبے میں سرکاری اور ماحول دوست بسوں کی مجموعی تعداد بڑھ کر 3 ہزار ہو جائے گی، جس سے عوام کو سستی اور معیاری سفری سہولیات میسر آئیں گی۔