مشرقِ وسطیٰ کی جنگیں ماحولیاتی نسل کشی کے مترادف ہیں: ایرانی صدر

ایرانی صدر مسعود پزشکیان نے آرمینیا میں منعقدہ عالمی ماحولیاتی اجلاس سے خطاب کرتے ہوئے عالمی برادری سے مطالبہ کیا ہے کہ مشرقِ وسطیٰ اور بالخصوص غزہ میں جاری جنگوں سے ہونے والی ماحولیاتی تباہی کی شدید مذمت کی جائے اور اسے ’ماحولیاتی نسل کشی‘ (Ecocide) قرار دیا جائے۔ اقوامِ متحدہ کے سیکرٹری جنرل انتونیو گوتریس کی موجودگی میں انہوں نے واضح کیا کہ جنگ کے اثرات اور قدرتی ماحول کو پہنچنے والا نقصان صرف سرحدوں تک محدود نہیں رہتا بلکہ پورا خطہ اس سے متاثر ہوتا ہے۔ ایرانی صدر نے زور دیا کہ ان بھیانک ماحولیاتی اثرات سے نمٹنے اور قدرتی وسائل کے تحفظ کے لیے بین الاقوامی سطح پر فوری اور مشترکہ اقدامات اٹھانا ناگزیر ہو چکا ہے۔