پشاور: دیر کالونی میں سکول حادثے کا مقدمہ درج، مالکان اور ٹھیکیدار نامزد

پشاور کے علاقے دیر کالونی میں واقع الخیر ایجوکیشن سسٹم کی عمارت کی چھتیں گرنے کے دلخراش حادثے کا مقدمہ تھانہ آغا میر جانی شاہ میں درج کر لیا گیا ہے۔

ایف آئی آر (FIR) کے متن کے مطابق اس افسوسناک المئے میں 30 سے زائد معصوم بچوں اور ایک خاتون ٹیچر کے جاں بحق ہونے کی تصدیق کی گئی ہے، جبکہ 52 افراد شدید زخمی ہوئے۔ مقدمے میں مؤقف اختیار کیا گیا ہے کہ سکول کی تعمیر میں انتہائی ناقص و معیار سے گری ہوئی مٹیریل کا استعمال کیا گیا تھا اور عمارت کی دوسری منزل پر واقع نرسری کلاس اور گراؤنڈ فلور کی چھتیں خستہ حالی کی وجہ سے زمین بوس ہوئیں۔

ایف آئی آر کے مطابق طلبہ اور والدین کی جانب سے عمارت کی بوسیدہ حالت کے بارے میں متعدد بار آگاہ کیا گیا لیکن سکول مالکان نے ان شکایات کو نظر انداز کر دیا۔ پولیس نے 16 مرلے اراضی پر قائم اس سکول کی عمارت بنانے والے ٹھیکیدار، مالکان (وحید اور جاوید) اور دیگر شیئر ہولڈرز کے خلاف قتل بالسبب اور تعزیراتِ پاکستان (PPC) کی دفعات 322، 148 اور 149 کے تحت مقدمہ درج کر کے ملزمان کی گرفتاری کے لیے چھاپے مارنا شروع کر دیے ہیں۔