امریکا میں مہنگائی مزید بڑھ گئی، ٹرمپ انتظامیہ قابو پانے کیلئے متحرک

امریکہ کی لیبر بیورو آف اسٹیٹسٹکس کی جانب سے جاری کردہ تازہ ترین رپورٹ کے مطابق ستمبر کے مہینے میں ملک میں مہنگائی کی شرح (افراطِ زر) میں ایک بار پھر غیر متوقع اور نمایاں اضافہ ریکارڈ کیا گیا ہے۔

رپورٹ کے مطابق ستمبر میں کنزیومر پرائس انڈیکس (CPI) میں اگست کے مقابلے میں 0.6 فیصد اضافہ ہوا، جس کے بعد امریکی سالانہ افراطِ زر کی شرح بڑھ کر 3.7 فیصد تک پہنچ گئی ہے۔ اس سے قبل اگست میں مہنگائی کی شرح 3.4 فیصد ریکارڈ کی گئی تھی، جبکہ معاشی ماہرین نے ستمبر میں یہ شرح 3.6 فیصد رہنے کی پیش گوئی کی تھی۔ خوراک اور توانائی کے قیمتوں کے شدید اتار چڑھاؤ کو نکال کر دیکھی جانے والی بنیادی مہنگائی (Core CPI) کی شرح بھی 2.6 فیصد پر جا پہنچی ہے۔

مہنگائی میں اس حالیہ اضافے کی بنیادی وجہ توانائی اور پٹرولیم مصنوعات کی قیمتوں میں تیزی ہے، جس نے امریکی شہریوں کی حقیقی قوتِ خرید اور تنخواہوں میں ہونے والے اضافے کو بری طرح متاثر کیا ہے۔ اشیائے ضروریہ اور روزمرہ کے دیگر اخراجات پورا کرنا عوام کے لیے مزید مشکل ہوتا جا رہا ہے۔ ان معاشی چیلنجز کے باعث صدر ڈونلڈ ٹرمپ کی انتظامیہ کی معاشی پالیسیوں اور فیڈرل ریزرو کی جانب سے شرعِ سود میں مزید اضافے کے امکانات پر امریکی سیاست اور بالخصوص آنے والے وسط مدتی انتخابات (Midterms) کے تناظر میں شدید بحث چھڑ گئی ہے