پنجاب کے میڈیکل و ڈینٹل کالجز میں داخلوں کی پالیسی جاری

پنجاب کے تمام سرکاری اور نجی میڈیکل و ڈینٹل کالجز میں تعلیمی سیشن 2026-27 کے لیے ایم بی بی ایس (MBBS) اور بی ڈی ایس (BDS) میں داخلوں کی جامع پالیسی باضابطہ طور پر جاری کر دی گئی ہے۔

پالیسی کے مطابق یونیورسٹی آف ہیلتھ سائنسز (UHS) لاہور صوبے بھر کے تمام سرکاری اور نجی میڈیکل و ڈینٹل اداروں میں مرکزی داخلوں کے عمل کی ذمہ دار ہو گی۔ پالیسی کے تحت میرٹ کا تعین تین اجزا کی بنیاد پر کیا جائے گا، جس میں MDCAT کے نمبروں کو 50 فیصد، ایف ایس سی (پری میڈیکل) کو 40 فیصد اور میٹرک کو 10 فیصد وزن دیا جائے گا۔ امیدوار کے لیے ایم ڈی کیٹ پاس کرنا اور ایف ایس سی میں کم از کم 60 فیصد نمبر حاصل کرنا لازمی ہو گا۔ اس کے علاوہ بارہویں جماعت میں بائیولوجی اور کیمسٹری لازمی، جبکہ فزکس یا ریاضی بطور اختیاری مضمون پاس ہونا ضروری ہے۔

پالیسی میں واضح کیا گیا ہے کہ سپریم کورٹ کے 4 اپریل 2023 کے فیصلہ اور PMDC ریگولیشنز کی روشنی میں میڈیکل و ڈینٹل کالجز میں داخلوں کے لیے حافظِ قرآن ہونے کی بنیاد پر اضافی نمبر نہیں دیے جائیں گے۔ امیدوار آن لائن پورٹل پر آخری تاریخ تک اپنے ترجیحی کالجز کی فہرست منتخب کر سکیں گے، جس کے بعد اس فہرست یا ترتیب میں کوئی تبدیلی ممکن نہیں ہوگی۔