پاکستان اورعمان کے مختلف شعبوں میں مفاہمتی یادداشتوں پر دستخط، دوطرفہ تعاون بڑھانے پر اتفاق

وزیراعظم پاکستان شہباز شریف سے عمان کے وزیرِ خارجہ سید بدر بن حمد بن حمود البوسعیدی نے اہم ملاقات کی۔ عمانی وزیرِ خارجہ پاکستان کے نائب وزیراعظم و وزیرِ خارجہ سینیٹر محمد اسحاق ڈار کے ہمراہ پاک-عمان مشترکہ وزارتی کمیشن کے 8ویں اجلاس کی مشترکہ صدارت کے لیے اسلام آباد کے دورے پر ہیں۔

ملاقات کے دوران وزیراعظم شہباز شریف نے عمانی وزیرِ خارجہ کا خیرمقدم کرتے ہوئے کہا کہ پاکستان اور عمان کے درمیان مشترکہ مذہب، جغرافیائی قربت، تاریخ، ثقافت اور صدیوں پر محیط عوامی روابط برادرانہ تعلقات کی مضبوط بنیاد ہیں۔ انہوں نے عمان کو پاکستان کا اہم بحری ہمسایہ اور خطے میں قابلِ قدر شراکت دار قرار دیا۔ وزیراعظم نے مشترکہ وزارتی کمیشن کے 8ویں اجلاس کے کامیاب انعقاد پر اطمینان کا اظہار کیا اور تنازعات کے حل کے لیے عمان کے مذاکرات و سفارت کاری پر مبنی اصولی موقف کو سراہا۔

عمان کے وزیرِ خارجہ نے گرمجوش مہمان نوازی پر حکومتِ پاکستان کا شکریہ ادا کرتے ہوئے علاقائی کشیدگی میں کمی اور مسائل کے پرامن حل کے لیے پاکستان کی مسلسل سفارتی کوششوں کی تعریف کی۔ بعد ازاں، وزیراعظم شہباز شریف کی موجودگی میں دونوں ممالک نے کمیشن کے پروٹوکول کے ساتھ ساتھ ذرائع ابلاغ، خبروں کے تبادلے، تاریخی دستاویزات کی حفاظت، آئی ٹی و مواصلات اور سفارتی وفود کے تبادلوں سے متعلق متعدد اہم معاہدوں اور مفاہمتی یادداشتوں (MoUs) پر دستخط کیے۔