روس سے تیل کی رسد بڑھنے کی توقعات کے باعث عالمی منڈی میں قیمتیں کم

عالمی منڈی میں روس کی جانب سے خام تیل کی رسد (Supply) میں اضافے کی توقعات اور سفارتی پیش رفت کے باعث خام تیل کی قیمتوں میں نمایاں کمی ریکارڈ کی گئی ہے۔ بین الاقوامی مارکیٹ میں تیل کی قیمتوں میں یہ گراوٹ ان خبروں کے بعد دیکھی گئی ہے جن کے مطابق روسی تیل کی عالمی مارکیٹ میں فراہمی کے امکانات روشن ہوئے ہیں۔

برطانوی خبر رساں ایجنسی کی رپورٹ کے مطابق عالمی منڈی میں بین الاقوامی معیار کے ‘برینٹ خام تیل’ (Brent Crude) کی قیمت میں 1 ڈالر 37 سینٹ یعنی 1.31 فیصد کی کمی دیکھنے میں آئی، جس کے بعد برینٹ خام تیل کی قیمت 103 ڈالر 35 سینٹ فی بیرل پر سطح پر آ گئی۔

دوسری جانب امریکی خام تیل ‘ویسٹ ٹیکساس انٹرمیڈیٹ’ (WTI) کی قیمتوں میں بھی مندی کا رجحان رہا۔ امریکی خام تیل کی قیمت 1 ڈالر 30 سینٹ یعنی 1.42 فیصد کی کمی کے بعد 90 ڈالر 55 سینٹ فی بیرل ریکارڈ کی گئی۔ مارکیٹ ماہرین کے مطابق روسی ڈیزل اور خام تیل کی برآمدات سے متعلق سامنے آنے والے اعلانات کے بعد آنے والے دنوں میں عالمی سطح پر انرجی مارکیٹ کا دباؤ مزید کم ہونے کا امکان ہے۔