ڈی آئی خان میں دفعہ 144 نافذ، جلسے جلوسوں اور ڈبل سواری پر پابندی

ضلع ڈیرہ اسماعیل خان میں امن و امان کی صورتحال کو برقرار رکھنے اور کسی بھی ناخوشگوار واقعے سے نمٹنے کے لیے انتظامیہ نے اہم اقدام اٹھاتے ہوئے پورے ضلع میں ایک ماہ کے لیے دفعہ 144 نافذ کر دی ہے۔

ڈپٹی کمشنر ڈیرہ اسماعیل خان حکمت اللہ کی جانب سے جاری کردہ باضابطہ اعلامیے کے مطابق ضلع بھر میں ہر قسم کے جلسے، جلوسوں، ریلیوں اور عوام کے سیاسی و مذہبی اجتماعات پر 30 روز کے لیے مکمل پابندی عائد کر دی گئی ہے۔ اس کے علاوہ موٹر سائیکل کی ڈبل سواری، کسی بھی قسم کے اسلحے کی نمائش اور سڑکوں یا شاہراہوں پر بلاجواز خیمے لگانے پر بھی سخت قدغن لگا دی گئی ہے۔

ڈپٹی کمشنر کے مطابق دفعہ 144 کا نفاذ 13 اکتوبر سے 11 نومبر تک مؤثر رہے گا۔ انتظامیہ نے واضح کیا ہے کہ ان احکامات کی خلاف ورزی کرنے والے افراد کے خلاف تعزیراتِ پاکستان (PPC) کی دفعہ 188 کے تحت بلا امتیاز سخت قانونی و ضابطے کی کارروائی عمل میں لائی جائے گی۔