امریکی صدر ٹرمپ کا اردگان سے حوثیوں کیخلاف کارروائی کا مطالبہ کرنے کا عندیہ

امریکی صدر ڈونلڈ ٹرمپ (Donald Trump) نے میڈیا کے نمائندگان سے گفتگو کرتے ہوئے کہا ہے کہ وہ تنازع کے پیشِ نظر ترک صدر رجب طیب اردوان سے کہہ سکتے ہیں کہ وہ یمن میں حوثی باغیوں کے خلاف عسکری کارروائیوں میں کردار ادا کریں۔

صدر ڈونلڈ ٹرمپ نے یمن کے حوثی گروہ کے حالیہ اقدامات پر سخت برہمی کا اظہار کرتے ہوئے کہا کہ حوثی جنگجو سعودی عرب کے قومی مفادات اور تیل کی تنصیبات کو نشانہ بنا کر انتہائی جارحانہ اور ‘انتہائی برا’ رویہ اختیار کیے ہوئے ہیں۔ انہوں نے ترک صدر کے ساتھ اپنے تعلقات کا ذکر کرتے ہوئے دعویٰ کیا کہ “میرا خیال ہے کہ صدر اردوان وہی کچھ کریں گے جو میں ان سے کرنے کو کہوں گا۔” اس کے علاوہ امریکی صدر نے واضح کیا کہ وہ مشرقِ وسطیٰ اور ایران کے حوالے سے بہت جلد اہم اور حتمی پالیسی فیصلے کریں گے۔

واضح رہے کہ امریکی صدر کا یہ بیان ایک ایسے وقت میں سامنے آیا ہے جب ایک روز قبل ہی انہوں نے اپنے ایک بیان میں کہا تھا کہ ایرانی رہنماؤں کی ہلاکت کے تناظر میں شاید امریکہ نے ضرورت سے زیادہ جارحانہ ردِعمل ظاہر کیا تھا، تاہم انہوں نے اس حوالے سے مزید وضاحت یا تفصیلات فراہم نہیں کی تھیں۔