اسلام آباد میں یونیورسٹی کی طالبہ پراسرار طور پر جاں بحق

وفاقی دارالحکومت اسلام آباد کے تھانہ رمنا کی حدود میں واقع جی الیون اتوار بازار کے قریب سے انٹرنیشنل اسلامک یونیورسٹی کی طالبہ لائبہ کی لاش پراسرار حالت میں برآمد ہوئی ہے۔ پولیس کے مطابق ابتدائی معلومات سے پتہ چلا ہے کہ متوفیہ جی الیون سیکٹر کی رہائشی تھی اور وقوعہ کے روز دوپہر دو بجے کے قریب اپنے گھر سے نکلی تھی، جس کے بعد اس کی ہلاکت کی خبر سامنے آئی۔

ذرائع و ابتدائی اطلاعات کے مطابق طالبہ نے امریکہ کے ویزے اور سفر کی غرض سے نعمان نامی ایجنٹ کو مبینہ طور پر 50 لاکھ روپے رقم ادا کی تھی۔ تاہم، امریکہ جانے کے لیے فراہم کردہ دستاویزات کے جعلی نکلنے پر وہ شدید ذہنی دباؤ اور تناؤ کا شکار تھی۔ پولیس حکام کا کہنا ہے کہ اس مبینہ مالی فراڈ اور طالبہ کی موت کے درمیان حتمی تعلق کی ابھی تک سرکاری سطح پر تصدیق نہیں ہوئی ہے۔ پولیس کی کرائم سین ٹیم نے موقع سے تمام شواہد اکٹھے کر لیے ہیں اور واقعے کی مختلف پہلوؤں سے تفتیش شروع کر دی ہے تاکہ موت کی اصل وجوہات اور حالات کا تعین کیا جا سکے۔