مارچ بانی پی ٹی آئی سے ملاقات اور تمام جائز مطالبات تسلیم ہونے تک جاری رہے گا: شوکت یوسفزئی

پاکستان تحریک انصاف (پی ٹی آئی) خیبر پختونخوا کے صوبائی ترجمان شوکت یوسفزئی نے بڑا سیاسی اعلان کرتے ہوئے کہا ہے کہ تحریک انصاف کا احتجاجی مارچ بانی پی ٹی آئی سے رہائی یا ملاقات سمیت تمام جائز مطالبات کی منظوری تک بلا تعطل جاری رہے گا۔ انہوں نے واضح کیا کہ رواں مالی سال کے بجٹ میں صوبائی حکومت نے پولیس اور امن و امان کے قیام کے لیے 190 ارب روپے مختص کیے ہیں، جس سے امن و امان کے حوالے سے صوبائی حکومت کی سنجیدگی کا اندازہ لگایا جا سکتا ہے۔

سیاسی تناؤ اور ثالثی کی خبروں پر گفتگو کرتے ہوئے شوکت یوسفزئی نے کہا کہ اگر جمعیت علمائے اسلام (ف) کے سربراہ مولانا فضل الرحمٰن حکومت اور پی ٹی آئی کے درمیان تناؤ ختم کرانے اور ثالثی کے لیے آگے آتے ہیں تو پی ٹی آئی ان کا خیر مقدم کرے گی۔ خیبر پختونخوا میں گورنر راج کے ممکنہ نفاذ کی خبروں پر تنقید کرتے ہوئے انہوں نے کہا کہ گورنر راج کی تجاویز دینے والوں کی “رال ٹپک رہی ہے”، اور خیبر پختونخوا کے گورنر نے صوبائی انتظامی معاملات میں غیر ضروری مداخلت کر کے اپنے آئینی حلف کی سنگین خلاف ورزی کی ہے۔