سہیل آفریدی کا مارچ ٹھس، بس تاریخ پر تاریخ دے رہے ہیں: امیر مقام

وفاقی وزیر انجنئیر امیر مقام نے تحریک انصاف کے جاری احتجاجی مارچ اور وزیراعلیٰ خیبر پختونخوا سہیل آفریدی کی قیادت پر سخت تنقید کرتے ہوئے کہا ہے کہ مارچ ناکامی کا شکار ہو چکا ہے اور قیادت کے پاس محض “تاریخ پر تاریخ” دینے کے علاوہ کوئی حکمت عملی موجود نہیں۔ انہوں نے کہا کہ احتجاجی کارواں اپنی سمت کھو چکا ہے اور عوام نے اسے مکمل طور پر مسترد کر دیا ہے۔

دنیا نیوز کے پروگرام “ٹونائٹ ود ثمر عباس” میں گفتگو کرتے ہوئے وفاقی وزیر نے کہا کہ خیبر پختونخوا میں سیکیورٹی چیلنجز اور بڑھتی ہوئی کشیدگی سے نمٹنے کے لیے گورنر راج اور ایمرجنسی جیسے آپشنز مکمل طور پر آئینی اور قانونی ہیں اور اگر صورت حال نہ سدھری تو آخر کار حکومت کو انہی اقدامات کا سہارا لینا پڑے گا۔ انہوں نے مزید کہا کہ تحریک انصاف کے ساتھ مذاکرات کے دروازے اسی صورت کھل سکتے ہیں جب پی ٹی آئی قیادت واضح اور دوٹوک الفاظ میں دہشت گردوں کی مذمت کرے اور سیکیورٹی فورسز کا ساتھ دے، کیونکہ ڈیڈلاک کا خاتمہ اسی نقطے سے ممکن ہے جہاں سے یہ شروع ہوا تھا۔