ایران اب بھی امریکا کو جواب دینے کی بھرپور صلاحیت رکھتا ہے، بلومبرگ

امریکی خبر رساں ادارے “بلومبرگ” نے اپنی ایک حالیہ تحقیقی رپورٹ میں انکشاف کیا ہے کہ ایران پر بین الاقوامی پابندیوں اور تناؤ کے باوجود وہ امریکہ اور اس کے اتحادیوں کو سیکیورٹی سطح پر بھرپور جواب دینے کی صلاحیت رکھتا ہے۔ رپورٹ کے مطابق تہران نے نہ صرف اپنے بیلسٹک میزائلوں اور ڈرون ٹیکنالوجی کے وسیع ذخائر کو محفوظ رکھا ہے بلکہ حالیہ عرصے میں ہتھیاروں کے ان ذخائر میں کامیابی سے دوبارہ اضافہ بھی کیا ہے۔

بلومبرگ نے مغربی حکام کے حوالے سے دعویٰ کیا ہے کہ روس مبینہ طور پر ایران کو جدید میزائل اور عسکری سازوسامان فراہم کر رہا ہے تاکہ خطے میں سیکیورٹی توازن برقرار رہے، تاہم ماسکو یا تہران کی جانب سے اس دعوے کی رسمی یا آزادانہ تصدیق نہیں کی گئی۔ رپورٹ میں خبردار کیا گیا ہے کہ ایران کی محفوظ اور جدید ہوتی ہوئی عسکری تنصیبات مشرقِ وسطیٰ میں خطرے کی نئی صورتِ حال پیدا کر سکتی ہیں، جسے نظرانداز کرنا مغربی طاقتوں کے لیے ممکن نہیں ہوگا۔