پاکستان کا امریکا اور ایران کے درمیان 7 نکات پر مذاکرات جاری ہونے کا انکشاف

پاکستان نے عالمی سطح پر جاری سیکیورٹی کشیدگی کے دوران اہم سفارتی انکشاف کرتے ہوئے بتایا ہے کہ امریکہ اور ایران کے درمیان 7 نقاطی ایجنڈے پر پس پردہ مذاکرات کا سلسلہ جاری ہے۔ اسلام آباد میں ہفتہ وار میڈیا بریفنگ کے دوران ترجمان دفتر خارجہ سجاد حیدر خان نے انکشاف کیا کہ دونوں ممالک نے 7 بنیادی نکات پر اپنے اپنے مواقف کا تبادلہ کیا ہے، جو خطے میں کشیدگی کے خاتمے کی جانب ایک اہم پیش رفت ہے۔

ترجمان دفتر خارجہ نے اس بات کی تصدیق کی کہ واشنگٹن اور تہران کے درمیان یہ براہِ راست رابطے اور مذاکراتی عمل پاکستان کی مستقل سفارتی و ثالثی کوششوں کا نتیجہ ہیں۔ انہوں نے بتایا کہ اسلام آباد اور تہران و واشنگٹن کے درمیان مفاہمتی یادداشتیں (MoUs) پہلے سے موجود ہیں اور زیرِ بحث بیشتر نکات ان کی پاسداری کرتے ہیں۔ پاکستان نے اپنا واضح موقف دہراتے ہوئے کہا کہ وہ خطے میں کسی بھی نئے عسکری تصادم کے خلاف اور مذاکرات کے ذریعے تمام حل طلب مسائل کے تصفیے کا خواہا ں ہے، نیز ضرورت پڑنے پر اسلام آباد دونوں فریقین کے درمیان مکمل ثالث کا کردار دوبارہ ادا کرنے کے لیے ہمہ وقت تیار ہے۔