روسی حملوں سے یوکرین میں مزید ہلاکتیں، زیلنسکی کا نیٹو سے دفاعی امداد کا مطالبہ

برطانوی میڈیا نے دعویٰ کیا ہے کہ یوکرین پر تازہ ترین روسی ڈرون اور میزائل حملوں کے نتیجے میں مزید 3 افراد ہلاک اور 8 شدید زخمی ہو گئے ہیں، جبکہ گزشتہ 3 روز کے دوران جاری ان حملوں میں جاں بحق افراد کی مجموعی تعداد 50 سے تجاوز کر گئی ہے۔

رپورٹس کے مطابق یوکرینی شہر زاپوریزیا پر روسی حملے میں ایک شہری ہلاک اور 5 افراد زخمی ہوئے، جبکہ مغربی یوکرین میں بھی ایک ہلاکت کی تصدیق کی گئی ہے۔ مشرقی یوکرینی علاقوں پر داغے گئے گائیڈڈ بموں کے نتیجے میں اب تک 30 افراد ہلاک ہو چکے ہیں۔ ان مسلسل حملوں کے باعث یوکرین کا بجلی کا نظام اور توانائی کی بنیادی تنصیبات شدید متاثر ہوئی ہیں، جس سے شدید سردی سے قبل ملک بھر میں انرجی کرائسز کا خطرہ بڑھ گیا ہے۔ صورتِ حال پر ردِعمل دیتے ہوئے یوکرینی صدر وولودیمیر زیلنسکی نے نیٹو اور مغربی ممالک سے ہنگامی بنیادوں پر مزید فضائی دفاعی نظام (Air Defense Systems) اور گولہ بارود فراہم کرنے کا مطالبات دہرایا ہے تاکہ انسانی جانوں کا تحفظ کیا جا سکے۔