پاناما میں 7.7 شدت کا زلزلہ، متعدد ممالک میں سونامی کی وارننگ جاری

وسطی امریکی ملک پاناما میں 7.7 شدت کے انتہائی شدید زلزلے کے شدید جھٹکے محسوس کیے گئے ہیں، جس کے فوراً بعد پاناما سمیت خطے کے متعدد ساحلی ممالک میں تباہ کن “سونامی” کی وارننگ جاری کر دی گئی ہے۔ امریکی جیولوجیکل سروے (USGS) کے مطابق زلزلے کا مرکز زمین میں صرف 10 کلومیٹر کی گہرائی پر تھا، جس کے باعث زلزلے کے جھٹکے اور سمندری لہروں کے خدشات انتہائی خطرناک حد تک بڑھ گئے ہیں۔

سونامی وارننگ سینٹر کے مطابق اونچی اور خوفناک سمندری لہریں پاناما، چلی اور کولمبیا کے ساحلی علاقوں سے ٹکرا سکتی ہیں، جبکہ کوسٹاریکا، ایکواڈور، پیرو، نکاراگوا، ایل سلواڈور اور میکسیکو کی انتظامیہ کو بھی الرٹ جاری کر دیا گیا ہے۔ شدید ترین جھٹکوں کے باعث پاناما کے 6 صوبوں میں بجلی کا نظام درہم برہم ہو گیا ہے اور دارالحکومت کا بین الاقوامی ہوائی اڈا فلائٹ آپریشنز کے لیے عارضی طور پر بند کر دیا گیا ہے۔ انتظامیہ نے متاثرہ اور ساحلی علاقوں کے رہائشیوں کو ہنگامی بنیادوں پر اونچے مقامات کی جانب منتقل ہونے کی ہدایت جاری کر دی ہے۔