فلائی دبئی واقعہ کا ملزم اسرائیلی بن گوریون ایئرپورٹ کو نشانہ بنانا چاہتا تھا: اماراتی اٹارنی جنرل

دبئی سے تل ابیب جانے والی فلائی دبئی کی پرواز میں دورانِ پرواز کاک پٹ میں کپتان پر معاون پائلٹ کے چاقو اور کلہاڑی سے حملے کے کیس کی تحقیقات میں سنسنی خیز اور خوفناک انکشافات سامنے آئے ہیں۔ اماراتی حکام اور تحققیاتی اداروں کی رپورٹ کے مطابق عمان سے تعلق رکھنے والا عمانی معاون پائلٹ تل ابیب کے بن گوریون ایئرپورٹ پر 9/11 طرز کا خودکش حملہ کرنا چاہتا تھا اور اس کا منصوبہ طیارے پر مکمل قبضہ کر کے اسے ایئرپورٹ کی مرکزی مسافر عمارت (Terminal) سے ٹکرانا تھا۔

تحقیقات کے مطابق ملزم 2017ء میں آسٹریلیا میں تعلیم کے دوران انتہا پسندانہ نظریات سے متاثر ہوا تھا اور اس نے اس حملے کی منصوبہ بندی کے لیے ماضی میں دو بار تل ابیب کا دورہ کر کے ایئرپورٹ اور فلائٹ روٹ کا جائزہ بھی لیا تھا۔ ملزم نے وکیل کی موجودگی میں اعترافی بیان دیتے ہوئے اعتراف کیا ہے کہ اس نے یہ منصوبہ اکیلے بنایا تھا۔ واضح رہے کہ 30 ستمبر کو پیش آنے والے اس واقعے کے دوران پرواز کے کپتان، عملے کے ایک رکن اور مسافروں نے اپنی جان پر کھیل کر معاون پائلٹ کو قابو کیا، جس کے بعد طیارے کو سعودی عرب کے شہر تبوک کے ایئرپورٹ پر ہنگامی طور پر بحفاظت اتارا گیا تھا۔ اماراتی استغاثہ ملزم کے ممکنہ سہولت کاروں اور دیگر روابط کے حوالے سے مزید تحقیقات کر رہا ہے۔