امریکا کا مائیکروسافٹ اور بھارتی آئی ٹی کمپنیوں پر ویزا پروگرام کا غلط استعمال کرنے کا الزام، گرین کارڈ اسپانسرشپ معطل

ٹرمپ انتظامیہ نے ٹیکنالوجی شعبے کی دیو قامت کمپنی مائیکروسافٹ، ایڈوبی اور بھارت کی بڑی آئی ٹی آؤٹ سورسنگ کمپنیوں (انفوسس، ٹاٹا، وپرو، ایچ سی ایل، کاگنیزنٹ اور کیپ جیمنی) پر امریکی ورک ویزا پروگرام کا بے جا استعمال کرنے کا الزام عائد کرتے ہوئے انہیں مستقل گرین کارڈ اسپانسرشپ پروگرام (PERM) سے غیر معینہ مدت کے لیے معطل کر دیا ہے۔ نائب امریکی صدر جے ڈی وینس اور لیبر سیکرٹری کیتھ سونڈر لنگ نے واشنگٹن میں پریس بریفنگ کے دوران اس پابندی کا باقاعدہ اعلان کرتے ہوئے کہا کہ مائیکروسافٹ نے اس سسٹم کا سب سے زیادہ استحصال کیا ہے اور امریکی کارکنوں کے حق پر ڈاکہ ڈالا ہے۔

امریکی نائب صدر نے واضح کیا کہ انتظامیہ کا مقصد کمپنیوں کو نقصان پہنچانا نہیں بلکہ امریکی شہریوں کو روزگار کے موقع فراہم کرنا اور غیر ملکیوں کو گرین کارڈ دینے کے نظام میں ہونے والی دھاندلی کو روکنا ہے۔ دوسری جانب مائیکروسافٹ نے اپنے ویزا پروگرام کے دفاع میں بیان جاری کرتے ہوئے کہا ہے کہ وہ امریکی حکومت کو تمام تر تفصیلی معلومات فراہم کرنے کے لیے تیار ہے۔ امریکی انتظامیہ کے اس اچانک اقدام کے بعد وال اسٹریٹ میں مائیکروسافٹ اور بھارتی آئی ٹی کمپنیوں کے شیئرز کی قیمتوں میں مندی دیکھی گئی