پاکستان کی فیفا کی عالمی رینکنگ میں ایک درجہ ترقی

بین الاقوامی فٹبال کی عالمی تنظیم (فیفا) نے مردوں کی نئی عالمی رینکنگ جاری کر دی ہے، جس میں پاکستان نے ایک درجہ ترقی حاصل کرتے ہوئے 197ویں پوزیشن حاصل کر لی ہے۔ عالمی رینکنگ کی فہرست میں عالمی چیمپئن اسپین کی پہلی پوزیشن برقرار ہے، جبکہ ارجنٹائن دوسرے، فرانس تیسرے اور انگلینڈ چوتھے نمبر پر موجود ہے۔

نئی رینکنگ میں پرتگال دو درجے بہتری کے ساتھ پانچویں نمبر پر آ گیا ہے، جبکہ برازیل ایک درجہ تنزلی کے بعد چھٹے اور مراکش ساتویں نمبر پر منتقل ہو گیا ہے۔ سوئٹزرلینڈ 12ویں اور یونان پانچ درجے ترقی کے ساتھ 41ویں نمبر پر پہنچ گئے ہیں۔ ٹاپ 50 کی فہرست میں افریقی ٹیموں مالی اور جنوبی افریقہ نے 6، 6 درجے بہتری کے ساتھ بالترتیب 47ویں اور 48ویں پوزیشن حاصل کی۔ اس کے علاوہ ڈومینیکن ریپبلک 9 درجے کی نمایاں چھلانگ لگا کر 135ویں اور شمالی آئرلینڈ 6 درجے ترقی کے ساتھ 64ویں نمبر پر آ گیا ہے۔