وزیر خزانہ کی نیدرلینڈز کے کاروباری وفد سے ملاقات، سرمایہ کاری پر تبادلہ خیال

وفاقی وزیر خزانہ و محصولات سینیٹر محمد اورنگزیب نے فاؤنڈرز کاربن نیٹ ورک کی قیادت میں پاکستان کے دورے پر آئے نیدرلینڈز کے کاروباری اور سرمایہ کار وفد کے اعزاز میں ظہرانے کا اہتمام کیا، جس میں دوطرفہ اقتصادی شراکت داری کے فروغ پر تفصیلی تبادلہ خیال کیا گیا۔ اس موقع پر پاکستان میں نیدرلینڈز کے سفیر رابرٹ جان سیگرٹ، وزیراعظم کے مشیر برائے نجکاری اور گورنر اسٹیٹ بینک بھی موجود تھے۔ وزیر خزانہ نے وفد کو پاکستان کے بہتر ہوتے معاشی منظرنامے سے آگاہ کرتے ہوئے بتایا کہ ملک کے زرمبادلہ کے ذخائر بڑھ کر 21.4 ارب ڈالر کی تاریخی بلند ترین سطح پر پہنچ چکے ہیں۔ انہوں نے اس بات پر زور دیا کہ حکومت کی اولین ترجیحات میں برآمدات میں اضافہ، نجی شعبے کی قیادت میں ترقی، ساختی اصلاحات کا نفاذ اور سرمایہ کاروں کو سازگار ماحول فراہم کرنا شامل ہے تاکہ دوطرفہ تجارتی تعلقات کو مزید مستحکم بنایا جا سکے۔