پاکستان اور پولینڈ کا سکیورٹی و انسدادِ دہشتگردی تعاون بڑھانے پر اتفاق

وفاقی وزیر داخلہ محسن نقوی اور وزیر مملکت برائے داخلہ طلال چوہدری سے پولینڈ کے کونسل آف منسٹرز کے سربراہ اور وزیر ٹوماش شیمونیاک (Tomasz Siemoniak) نے اسلام آباد میں اعلیٰ سطح کی ملاقات کی۔ اس ملاقات میں پاکستان اور پولینڈ کے درمیان دوطرفہ سفارتی تعلقات، انٹیلی جنس شیئرنگ، انسدادِ دہشت گردی، غیر قانونی مائیگریشن کی روک تھام اور قانون نافذ کرنے والے اداروں کے مابین سیکیورٹی تعاون کو وسعت دینے پر تفصیلی تبادلہ خیال کیا گیا۔ فریقین نے میوچل لیگل اسسٹنس (Mutual Legal Assistance) سمیت مختلف مفاہمتی یادداشتوں (MoUs) کو جلد حتمی شکل دینے اور ویزہ فری سہولت (آفیشل پاسپورٹ کے لیے) فراہم کرنے کے امور پر اتفاق کیا۔

وزیر داخلہ محسن نقوی نے بتایا کہ حکومتِ پاکستان کی سخت پالیسیوں کے باعث یورپ کی جانب غیر قانونی امیگریشن میں 64 فیصد کی واضح کمی آئی ہے۔ پولش وزیر ٹوماش شیمونیاک نے خطے میں امن کے لیے پاکستان کی کاوشوں کو سراہتے ہوئے یورپی یونین کی جی ایس پی پلس (GSP+) اسکیم اور قانونی روزگار کے مواقع کی فراہمی میں مکمل تعاون کی یقین دہانی کرائی۔ سیکیورٹی اور معاشی روابط کو مزید مضبوط بنانے کے لیے وزیر مملکت طلال چوہدری کی سربراہی میں وزارتِ داخلہ کا ایک اعلیٰ سطحی وفد جلد پولینڈ کا دورہ کرے گا۔