موٹروے پولیس کی ایمانداری، شاہراہ پر ملنے والے لاکھوں روپے اصل مالک کے حوالے کر دیے

موٹروے پولیس سینٹرل ریجن نے ایمانداری اور فرض شناسی کی اعلیٰ مثال قائم کرتے ہوئے قومی شاہراہ (N-5) پر ملنے والی 5 لاکھ 45 ہزار روپے کی رقم بحفاظت اصل مالک کے حوالے کر دی۔ ترجمان موٹروے پولیس سینٹرل ریجن سید عمران احمد کے مطابق موٹروے پولیس کے افسر سب انسپکٹر (SI) صدام حسین اور کانسٹیبل محمد عاطف کو احمد پور شرقیہ کے قریب سڑک پر رقم پڑی ہونے کی اطلاع ملی تھی، جس پر انہوں نے فوری کارروائی کرتے ہوئے رقم اپنی تحویل میں لی۔

ترجمان کے مطابق تمام تر قانونی کارروائی اور ضروری تصدیقی عمل مکمل کرنے کے بعد یہ رقم اصل مالک دلشاد احمد کے حوالے کر دی گئی۔ گم شدہ رقم کی باحفاظت واپسی پر شہری دلشاد احمد نے موٹروے پولیس کی اعلیٰ دیانت داری، فرض شناسی اور پیشہ ورانہ کارکردگی پر افسران کا تہہ دل سے شکریہ ادا کیا۔