دشمن سے طویل جنگ کیلئے اسلحے کی وافر پیداواری صلاحیت موجود ہے: ایران

ایرانی وزارت دفاع کے ترجمان رضا طلائی نیک نے خبردار کیا ہے کہ ملک کے پیداواری نظام میں طویل جنگ جاری رکھنے کے لیے درکار اسلحہ بنانے کی بھرپور صلاحیت موجود ہے۔ انہوں نے بتایا کہ جنگ کے دوران اسلحے کی پیداوار معمول کے مقابلے میں ڈھائی گنا بڑھ چکی ہے، کیونکہ ایران نے پہلے ہی محفوظ اور متبادل پیداواری مقامات تیار کر رکھے تھے جس سے فوجی سازوسامان کی تیاری کا عمل ایک دن کے لیے بھی نہیں رکا۔ ترجمان کے مطابق اس عمل میں تقریباً 9 ہزار کمپنیوں نے رضاکارانہ طور پر حصہ لیا، جبکہ وزارت دفاع کا عملہ میدانِ جنگ کے تجربات کی روشنی میں ہتھیاروں کو مسلسل بہتر بنا رہا ہے۔ رضا طلائی نیک نے واضح کیا کہ ایران کی پہلی ترجیح ملکی دفاعی ضروریات کو پورا کرنا ہے، تاہم مستقبل میں اضافی دفاعی مصنوعات برآمد کرنے کا بھی ارادہ ہے۔