مذاکرات کے دروازے کھلے ہیں، ریاست کو یرغمال بنا کر کوئی مطالبہ نہیں منوایا جا سکتا: رانا ثناء

وزیراعظم کے مشیر رانا ثناء اللہ خان نے اسلام آباد میں پریس کانفرنس سے خطاب کرتے ہوئے واضح کیا ہے کہ حکومت کی طرف سے مذاکرات کے دروازے ہمیشہ کھلے ہیں، تاہم ریاست کو یرغمال بنا کر کوئی ناجائز مطالبہ نہیں منوایا جا سکتا۔ انہوں نے پی ٹی آئی کو تنقید کا نشانہ بناتے ہوئے کہا کہ ان کا واحد ایجنڈا ملک میں سیاسی عدم استحکام پیدا کرنا اور سیاست میں گالم گلوچ کا کلچر عام کرنا رہا ہے، اور 2014 کے دھرنے سے لے کر اب تک وہ اسی تسلسل کو آگے بڑھا رہے ہیں۔ کے پی حکومت کے رویے پر بات کرتے ہوئے رانا ثناء اللہ نے کہا کہ صوبائی وسائل کو سیاسی مقاصد کے لیے استعمال کیا جا رہا ہے جہاں ایک طرف شہداء کی لاشیں پڑی تھیں اور دوسری طرف صوبائی حکومت ڈھول بجا رہی تھی، جسے ہرگز برداشت نہیں کیا جائے گا۔ انٹیلی جنس بیسڈ آپریشنز کے حوالے سے انہوں نے کہا کہ یہ کارروائیاں دہشت گردوں کے خلاف جاری رہیں گی اور کوئی نیا آئی ڈی پیز بحران نہیں بن رہا، جبکہ افغان رجیم کو بھی باور کرا دیا گیا ہے کہ وہ اپنی سرزمین پاکستان کے خلاف استعمال نہ ہونے دیں۔