بیرئیر ہٹانے کے کیس میں ایمان مزاری اور ہادی علی چٹھہ پر فرد جرم عائد

اسلام آباد کی انسداد دہشت گردی عدالت میں بیرئیر ہٹانے کے کیس کی سماعت جج طاہر عباس سپرا کی سربراہی میں ہوئی۔ سماعت کے دوران ڈاکٹر شیریں مزاری اور دیگر وکلاء عدالت میں پیش ہوئے، جبکہ ایمان مزاری اور ہادی علی چٹھہ کو ویڈیو لنک کے ذریعے عدالت کے سامنے پیش کیا گیا۔ دفاعی ٹیم اور وکیل زینب جنجوعہ نے شدید اعتراض اٹھاتے ہوئے مؤقف اپنایا کہ عدالتی احکامات کے باوجود جیل میں ان کی اپنے مؤکلین سے ملاقات نہیں کرائی گئی اور نہ ہی انہیں قانونی کارروائی کی کاپیز فراہم کی گئیں، لہٰذا قانونی تقاضے پورے کیے بغیر فرد جرم عائد نہیں کی جا سکتی۔ تاہم، عدالت نے تمام اعتراضات کو مسترد کرتے ہوئے دونوں ملزمان پر فرد جرم عائد کر دی اور جج طاہر عباس نے وکلاء کو اس حکم کو چیلنج کرنے کی ہدایت کی۔ عدالت نے آئندہ سماعت پر ایمان مزاری اور ہادی علی چٹھہ کو ذاتی حیثیت میں پیش کرنے کا حکم دیتے ہوئے کیس کی کارروائی 9 اکتوبر تک ملتوی کر دی اور استغاثہ کے گواہوں کو بھی طلب کر لیا ہے۔