چیف جسٹس لاہور ہائیکورٹ کے اقدامات سے 2 سال سے لاپتہ لڑکی بازیاب

چیف جسٹس لاہور ہائیکورٹ عالیہ نیلم کے سخت احکامات اور ذاتی دلچسپی کے نتیجے میں دو سال سے لاپتہ 16 سالہ لڑکی کو بازیاب کرا کے عدالت میں پیش کر دیا گیا۔ کیس کی سماعت کے دوران آئی جی پنجاب راؤ عبد الکریم بھی عدالت میں پیش ہوئے اور بازیاب ہونے والی لڑکی کی شناخت کی تصدیق کی۔ سماعت کے دوران انکشاف ہوا کہ پنجاب میں بچیوں کے اغوا اور گمشدگی کے 500 سے زائد کیسز زیر التوا ہیں۔ چیف جسٹس عالیہ نیلم نے لاپتہ بچیوں کی اتنی بڑی تعداد پر سخت تشویش کا اظہار کرتے ہوئے ریمارکس دیے کہ عدالت کے نوٹس لینے کے بعد ہی پولیس حرکت میں آئی اور معمولی سی کوشش سے لڑکی بازیاب ہو گئی۔ انہوں نے پولیس کے رویے پرفکری سوال اٹھاتے ہوئے کہا کہ خواتین اور بچیوں کے مقدمات میں پولیس کو انتہائی حساسیت کا مظاہرہ کرنا چاہیے اور پولیس کے بعض حلقوں میں پائے جانے والے منفی رجحان کو فوری طور پر تبدیل کرنے کی ضرورت ہے۔ عدالت نے آئی جی پنجاب سے پنجاب بھر میں لاپتہ بچیوں کی بازیابی اور زیر التوا مقدمات کی تفصیلی رپورٹ طلب کرتے ہوئے سماعت ملتوی کر دی۔