ملٹری اے آئی کے استعمال میں انسانی فیصلہ سازی اور کنٹرول یقینی بنایا جائے: شرمیلا فاروقی

پاکستان کی رکن قومی اسمبلی ڈاکٹر شرمیلا فاروقی نے تنزانیہ کے شہر اروشا میں منعقدہ انٹر پارلیمنٹری یونین (آئی پی یو) کی 153ویں اسمبلی کے اجلاس میں شرکت کی اور بین الاقوامی امن و سلامتی سے متعلق قائمہ کمیٹی کے اجلاس سے خطاب کیا۔ اس موقع پر انہوں نے ملٹری اے آئی کے ذمہ دارانہ ضابطہ کار سے متعلق پاکستان کے مؤقف کو اجاگر کرتے ہوئے زور دیا کہ فوجی شعبے میں مصنوعی ذہانت کے استعمال کے دوران بامعنی انسانی فیصلہ سازی اور کنٹرول کو ہر صورت یقینی بنایا جائے۔ انہوں نے خبردار کیا کہ ملٹری اے آئی فیصلہ سازی کا وقت محدود کر کے غلط اندازوں اور غیر ارادی کشیدگی کا سبب بن سکتی ہے، بالخصوص جنوبی ایشیا جیسے حساس خطے میں۔ ڈاکٹر شرمیلا فاروقی نے مطالبہ کیا کہ مہلک خودکار ہتھیاروں کے نظام سے متعلق قانونی طور پر پابند بین الاقوامی قواعد وضع کیے جائیں اور اس عمل میں ترقی پذیر ممالک کی مساوی نمائندگی کو یقینی بنایا جائے۔