کراچی کے نوجوانوں کے ساتھ ناانصافیاں کی جا رہی: فاروق ستار

متحدہ قومی موومنٹ (ایم کیو ایم) پاکستان کے سینئر رہنما ڈاکٹر فاروق ستار نے پریس کانفرنس سے خطاب کرتے ہوئے سندھ حکومت پر بدترین کرپشن کے الزامات عائد کیے ہیں۔ انہوں نے کہا کہ 2020ء سے ایم ڈی کیٹ کے نظام میں خرابیوں کا سلسلہ جاری ہے اور فیسوں میں اضافے کے باوجود کراچی کے 12 ہزار طلبہ کے لیے صرف دو امتحانی مراکز بنائے گئے، جہاں انہیں شدید گرمی میں کھلے میدانوں میں امتحان دینا پڑا۔ فاروق ستار نے الزام لگایا کہ سندھ کے تمام وسائل اور تعلیمی اداروں پر پیپلز پارٹی اور وڈیروں کا قبضہ ہے، اور سوچی سمجھی سازش کے تحت شہری علاقوں کے طلبہ کے مستقبل کو تاریک کیا جا رہا ہے۔