گورنر راج اچھا فیصلہ نہیں، آخری حد پر نہیں جانا چاہتے: امیر مقام

وفاقی وزیر امور کشمیر و گلگت بلتستان امیر مقام نے زاہد خان اور ثمر بلور کے ہمراہ پریس کانفرنس کرتے ہوئے کہا ہے کہ خیبر پختونخوا میں حکومت نام کی کوئی چیز نہیں ہے اور صوبے کو لاوارث چھوڑ دیا گیا ہے۔ انہوں نے تنقید کرتے ہوئے کہا کہ خیبر پختونخوا جل رہا ہے، عوام مشکلات کا شکار ہیں اور لوگ اپنے پیاروں کی لاشیں اٹھا رہے ہیں، جب کہ وزیراعلیٰ خیبر پختونخوا اپنے منصب کی ذمہ داریاں نبھانے کے بجائے دھرنوں اور دیگر صوبوں کے دوروں میں مصروف ہیں۔ امیر مقام نے اس بات پر زور دیا کہ دہشتگردی جیسے گھمبیر معاملے پر تمام سیاسی قوتوں کو ایک پیج پر ہونا چاہیے۔