بلاول بھٹو کا حکومت اور اپوزیشن میں ملاقات کا خیر مقدم

پاکستان پیپلز پارٹی (پی پی پی) کے چیئرمین بلاول بھٹو زرداری نے حکومت اور اپوزیشن کے درمیان مذاکرات کی بحالی اور ملاقات کا خیر مقدم کیا ہے۔ سماجی رابطے کی ویب سائٹ (ایکس) پر اپنے پیغام میں انہوں نے امید ظاہر کی کہ ان مذاکرات کے مثبت اختتام پر اپوزیشن غیر مشروط طور پر اپنے مجوزہ لانگ مارچ کو ختم کرنے کا اعلان کرے گی، کیونکہ تمام سیاسی مسائل کا حل صرف سیاسی اور آئینی طریقہ کار سے ہی ممکن ہے۔

بلاول بھٹو زرداری نے ملک کو درپیش سیکیورٹی چیلنجز پر تشویش کا اظہار کرتے ہوئے کہا کہ ہمسایہ ممالک کی فعال حمایت سے ابھرنے والا دہشت گردی کا نیا چیلنج پاکستان کی بقا کے لیے ایک سنگین خطرہ بن چکا ہے۔ انہوں نے زور دیا کہ اس نازک وقت میں بحیثیت قوم متحد ہو کر دہشت گردی کی لعنت کا مقابلہ کرنا ہوگا، اور اعادہ کیا کہ پاکستان پیپلز پارٹی دہشت گردی کی سرکوبی کے لیے پرعزم رہی ہے اور ہمیشہ پیش پیش رہے گی۔