وزیراعظم کا صومالیہ میں جاں بحق 3 پاکستانیوں کے لواحقین کیلیے امداد کا اعلان

وزیراعظم محمد شہباز شریف نے صومالیہ میں قزاقوں کے ہاتھوں یرغمال بنائے گئے جہاز ‘آنر 25’ کی بازیابی کے لیے آپریشن کے دوران جاں بحق ہونے والے 3 پاکستانی شہریوں—سید کاشف عمر، محمود احمد انصاری اور رفیع اللہ خان—کے لواحقین کے لیے فی خاندان 1 کروڑ 25 لاکھ روپے کی مالی امداد کا اعلان کیا ہے۔ اس کے علاوہ حکومت نے متاثرہ خاندانوں کو مفت رہائش (گھر) اور جاں بحق افراد کے بچوں کے تمام تعلیمی و طبی اخراجات سرکاری سطح پر برداشت کرنے کا بھی فیصلہ کیا ہے۔

وزیراعظم نے جاں بحق شہری کاشف عمر کے بیٹے اذہان کاشف سے ٹیلی فون پر گفتگو کرتے ہوئے دلی تعزیت اور غم کا اظہار کیا۔ انہوں نے وزارتِ خارجہ اور متعلقہ اداروں کو ہدایت کی کہ صومالی حکام سے مسلسل رابطے میں رہ کر جاں بحق پاکستانیوں کی میتیں جلد از جلد وطن واپس لائی جائیں۔ شہباز شریف نے واقعے میں زخمی ہونے والے دیگر پاکستانیوں کو بہترین علاج معالجے کی سہولیات فراہم کرنے اور بحری جہاز کے تمام باحفاظت عملے کی فوری واپسی یقینی بنانے کی سخت ہدایت کی۔