آبنائے ہرمز میں کشیدگی، یورو زون میں مہنگائی 3 سال کی بلند ترین سطح پر پہنچ گئی

اسرائیل اور امریکہ کی جانب سے جنگ مسلط کیے جانے کے ردِعمل میں ایران کی جانب سے گزشتہ مارچ سے تیل و گیس کی اہم ترین عالمی آبی گزرگاہ “آبنائے ہرمز” کو بند رکھا گیا ہے، جس کے نتیجے میں دنیا بھر میں ایندھن کی شدید قلت اور قیمتوں میں ہوشربا اضافہ دیکھنے میں آ رہا ہے۔ اس بحران کے اثرات یورو زون پر بھی شدید طور پر مرتب ہوئے ہیں، جہاں یورو کرنسی استعمال کرنے والے 21 یورپی ممالک میں ستمبر کے دوران مہنگائی کی شرح بڑھ کر 3.8 فیصد تک پہنچ گئی ہے، جو کہ گزشتہ تین سالوں کے دوران بلند ترین سطح ہے۔

یورپی یونین کے شماریاتی ادارے کی رپورٹ کے مطابق اگست میں یورو زون میں مہنگائی کی شرح 3.2 فیصد تھی، جبکہ ماہرینِ اقتصادیات نے ستمبر کے لیے 3.7 فیصد کی پیش گوئی کی تھی۔ اعداد و شمار سے معلوم ہوتا ہے کہ سالانہ بنیادوں پر ایندھن کی قیمتوں میں 18.8 فیصد کا بیحد بڑا اضافہ ہوا ہے، جس کے باعث خوراک اور مشروبات کی لاگت میں بھی اضافہ ریکارڈ کیا گیا۔ مہنگائی کی اس نئی لہر نے یورپی سینٹرل بینک (ECB) کے لیے شدید چیلنجز پیدا کر دیے ہیں، کیونکہ اس کا بنیادی ہدف افراطِ زر کو 2 فیصد پر برقرار رکھنا تھا، جس سے اب شرحِ سود میں مزید اضافے کے امکانات روشن ہو گئے ہیں