مونال ریسٹورنٹ گرانے کے سابق چیف جسٹس قاضی فائز کے فیصلے پر نظرثانی کا تفصیلی فیصلہ جاری

وفاقی آئینی عدالت نے اسلام آباد کے تاریخی مارگلہ ہلز نیشنل پارک میں قائم “مونال” سمیت دیگر ریسٹورنٹس کو مسمار کرنے کے حوالے سے سابق چیف جسٹس قاضی فائز عیسیٰ کے فیصلے پر دائر نظرثانی درخواستوں کا 44 صفحات پر مشتمل تفصیلی تحریری فیصلہ جاری کر دیا ہے۔ عدالت نے کیپیٹل ڈویلپمنٹ اتھارٹی (سی ڈی اے) اور میٹروپولیٹن کارپوریشن اسلام آباد (ایم سی آئی) کی اپیلیں منظور کرتے ہوئے سپریم کورٹ کا 21 اگست 2024 اور 10 ستمبر 2024 کا ریویو فیصلہ اور ریسٹورنٹس کو مسمار کرنے کا حکم کالعدم قرار دے دیا ہے۔

آئینی عدالت نے قرار دیا ہے کہ نیشنل پارک کی حدود میں لیز، ملکیت اور کرائے کے تنازعات کا فیصلہ اب سول کورٹ تمام تر ثبوت اور شہادتیں ریکارڈ کرنے کے بعد کرے گی۔ فیصلے کے مطابق مارگلہ ہلز نیشنل پارک میں عوام کی تفریح، ریسٹ ہاؤسز، ہوٹلز یا عمارتوں کی تعمیر پر کوئی مطلق پابندی نہیں ہے، تاہم تمام تر تعمیرات کو ماحولیاتی تحفظ کے قوانین کے مطابق ہونا لازم ہوگا۔ عدالت نے وائلڈ لائف مینجمنٹ بورڈ کے پاس جمع شدہ کرائے کی رقم سرکاری خزانے میں جمع کرانے کی ہدایت کرتے ہوئے سول عدالت کو تمام متعلقہ مقدمات کو یکجا کر کے جلد از جلد فیصلہ کرنے کا حکم دیا ہے۔