ایم ڈی کیٹ 2026: سندھ کے ٹاپ 20 میں کراچی کا کوئی امیدوار شامل نہیں

شہرِ قائد میں ایم ڈی کیٹ 2026 (MDCAT) کے اعلان کردہ نتائج کے مطابق سندھ کے ٹاپ 20 امیدواروں میں کراچی ڈویژن کا ایک بھی امیدوار جگہ بنانے میں ناکام رہا ہے۔ نتائج کے اعداد و شمار کے مطابق سندھ بھر سے مجموعی طور پر 33 ہزار 336 امیدواروں نے میڈیکل اینٹری ٹیسٹ میں حصہ لیا، جن میں 20 ہزار 831 طالبات اور 12 ہزار 505 طلبہ شامل تھے۔ صوبے بھر میں ایم ڈی کیٹ کا سب سے زیادہ سکور 179 نمبر رہا، جبکہ تمام امیدواروں کا اوسط سکور 101.27 ریکارڈ کیا گیا۔ مجموعی طور پر سندھ میں 16 ہزار 507 امیدوار ایم بی بی ایس اور بی ڈی ایس کے لیے کوالیفائی کر گئے، جبکہ 19 ہزار 323 امیدوار صرف بی ڈی ایس کی اہلیت کے معیار پر پورا اترے۔

دوسری جانب کراچی ڈویژن سے مجموعی طور پر 9 ہزار 505 امیدواروں نے ایم ڈی کیٹ کا امتحان دیا، جن میں سے 5 ہزار 492 امیدواروں نے ایم بی بی ایس اور بی ڈی ایس کے لیے کوالیفائی کیا، یوں کراچی ڈویژن کا کامیابی کا تناسب 57.78 فیصد رہا۔ ضلع وار اعداد و شمار کے مطابق کراچی ایسٹ سے 2 ہزار 927 اور کراچی سینٹرل سے 2 ہزار 141 امیدواروں نے امتحان میں شرکت کی، جن میں سے سب سے زیادہ 1 ہزار 815 کامیاب امیدواروں کا تعلق کراچی ایسٹ سے ہے۔ رپورٹ میں مزید بتایا گیا ہے کہ سندھ بھر میں امتحان دینے والے 42.04 فیصد امیدوار مطلوبہ پاسنگ معیار پر پورا نہیں اتر سکے، تاہم کامیابی اور شرکت دونوں ہی لحاظ سے طالبات کا تناسب طلبہ کے مقابلے میں نمایاں طور پر زیادہ رہا۔