مسافروں کو نامناسب سہولیات اور سامان کی ترسیل میں تاخیر، پاکستان ایئرپورٹ اتھارٹی کا پی آئی اے پر ایک کروڑ سے زائد کا جرمانہ

پاکستان ایئرپورٹ اتھارٹی (PAA) نے مسافروں کو نامناسب سہولیات کی فراہمی اور پروازوں کی آمد کے بعد سامان کی ترسیل میں تاخیر پر قومی ایئرلائن (PIA) کو ایک کروڑ روپے سے زائد کا بھاری جرمانہ عائد کر دیا ہے۔ پی آئی اے کو اس حوالے سے باضابطہ حکمنامہ موصول ہو چکا ہے جس میں 25 ستمبر تک مکمل جرمانہ ادا کرنے کا حتمی حکم دیا گیا تھا، تاہم ذرائع کے مطابق پی آئی اے وارننگ کے باوجود جرمانہ ادا کرنے میں ناکام رہی ہے۔

دستاویزات اور ذرائع کے مطابق پی آئی اے کو یہ جرمانہ آپریشنل بے ضابطگیوں اور گراؤنڈ ہینڈلنگ کے دوران تاخیر کے باعث برداشت کرنا پڑ رہا ہے۔ اس مجموعی جرمانے کا بڑا حصہ یعنی صرف اسلام آباد ایئرپورٹ پر پی آئی اے کو 70 لاکھ روپے سے زائد کا جرمانہ ہوا ہے، جبکہ اکیلے لاہور ایئرپورٹ پر بھی قومی ایئرلائن کو 14 لاکھ 85 ہزار روپے کا جرمانہ عائد کیا گیا ہے۔

دوسری جانب، پی آئی اے حکام نے سامان کی تاخیر کا سارا ملبہ پاکستان ایئرپورٹ اتھارٹی پر ڈال دیا ہے۔ پی آئی اے کے جنرل مینجر ٹریفک طارق مجید کا مؤقف ہے کہ اسلام آباد ایئرپورٹ پر پی اے اے کی کنویئر بیلٹ اور اسکینرز مناسب حالت میں نہ ہونے کی وجہ سے مسافروں کا سامان تاخیر کا شکار ہوتا ہے۔ انہوں نے یہ بھی وضاحت کی کہ متعدد پروازوں کے بیک وقت اترنے اور پی اے اے کی آپریشنل کیپیسٹی میں کمی کے باعث بھی سامان کی بروقت ترسیل میں شدید مشکلات کا سامنا کرنا پڑتا ہے۔

ادھر پی آئی اے کے ترجمان عبداللہ خان کا کہنا ہے کہ اس نوعیت کے جرمانے معمول کی کارروائی کا حصہ ہیں اور دیگر ایئرلائنز پر بھی جرمانے عائد کیے جاتے ہیں۔ انہوں نے بتایا کہ ان جرمانوں کو کم یا ختم کروانے کے لیے پاکستان ایئرپورٹس اتھارٹی کے ساتھ اعلیٰ سطح پر بات چیت کی جارہی ہے۔