شمالی وزیرستان میں سکیورٹی فورسز کا آپریشن، 8 دہشت گرد ہلاک

شمالی وزیرستان میں سیکیورٹی فورسز نے انٹیلی جنس معلومات کی بنیاد پر ایک کامیاب آپریشن کے دوران  8 دہشت گردوں کو جہنم واصل کر دیا ہے۔ سیکیورٹی ذرائع کے مطابق کارروائی کے دوران دہشت گردوں کے متعدد ٹھکانوں کو مکمل طور پر تباہ کر دیا گیا، جبکہ ہلاک خوارج کے قبضے سے بھاری مقدار میں اسلحہ، گولہ بارود اور دھماکہ خیز مواد بھی برآمد ہوا ہے۔

سیکیورٹی ذرائع نے مزید انکشاف کیا کہ آپریشن کے دوران دہشت گردوں نے کارروائی سے بچنے کے لیے مقامی مسجد کو بطورِ ڈھال استعمال کرنے کی بزدلانہ کوشش کی، تاہم فورسز نے پیشہ ورانہ مہارت کا مظاہرہ کرتے ہوئے اور مسجد کے مقدس مقام کے احترام کو ملحوظِ خاطر رکھتے ہوئے تمام دہشت گردوں کو ٹھکانے لگایا۔ سیکیورٹی فورسز نے اعادہ کیا ہے کہ خیبر پختونخوا سے دہشت گردی کے مکمل خاتمے تک بلامعطل کارروائیاں جاری رہیں گی۔