کے پی پولیس ایکٹ پر تحفظات، یہ قانون سازی آئین کی خلاف ورزی ہے: طلال چودھری

وزیر مملکت برائے داخلہ سینیٹر طلال چوہدری نے خیبر پختونخوا حکومت کی جانب سے منظور کیے گئے ‘پولیس ایکٹ 2026’ کے مسودے پر شدید تحفظات کا اظہار کرتے ہوئے واضح کیا ہے کہ آئین کے تحت صوبے اپنی الگ فوج یا پولیس فورس قائم نہیں کر سکتے۔ اسلام آباد میں پریس کانفرنس کرتے ہوئے طلال چوہدری نے کہا کہ پولیس سروس آف پاکستان (PSP) کے قوانین وفاق کے دائرہ اختیار میں آتے ہیں اور آئین کے خلاف ورزی کرتے ہوئے پولیس کے بنیادی کمانڈ اسٹرکچر کو کسی سیاسی ایجنڈے کے تحت تباہ کرنے کی اجازت نہیں دی جا سکتی۔

خیبر پختونخوا کابینہ کے مجوزہ پولیس ایکٹ 2026 میں آئی جی پی (IGP) کی تعیناتی کے لیے وفاق کی جانب سے بھیجے گئے پینل کو مسترد کرنے کا اختیار صوبائی حکومت کو دینے کے ساتھ ساتھ آر پی اوز (RPOs) اور ڈی پی اوز (DPOs) کی تعیناتیوں و تبادلوں کا اختیار وزیراعلیٰ اور محکمہ داخلہ کے سپرد کرنے کی تجاویز شامل ہیں۔ سینیٹر طلال چوہدری نے ان ترمیمات کو تنقید کا نشانہ بناتے ہوئے کہا کہ ڈی ایس پی سے آئی جی تک تمام اختیارات وزیراعلیٰ کے پاس منتقل ہونے سے فورس کی غیر سیاسی حیثیت ختم ہو جائے گی اور دہشت گردی کے خلاف برسرِ پیکار پولیس کا نظام مفلوج ہو کر رہ جائے گا۔