اسلام آباد: مفاہمت کا راستہ کبھی بند نہیں کیا، 27 ستمبر کا لانگ مارچ ہر صورت ہوگا: بیرسٹر گوہر

پاکستان تحریک انصاف (پی ٹی آئی) کے چیئرمین بیرسٹر گوہر علی خان نے پارلیمنٹ کے باہر میڈیا سے گفتگو کرتے ہوئے کہا ہے کہ تحریک انصاف نے معاملات کو بہتری کی طرف لے جانے کے لیے ہمیشہ کوشش کی ہے اور مفاہمت و مذاکرات کا راستہ کبھی بند نہیں کیا۔ انہوں نے بتایا کہ پی ٹی آئی قیادت اور پارلیمانی پارٹی کی اہم ملاقاتیں ہوئی ہیں جس کے بعد موقف میڈیا کے سامنے رکھا گیا ہے۔ بیرسٹر گوہر نے سوال اٹھایا کہ اگر انصاف نہ ملے، بات نہ سنی جائے، عدالتی احکامات پر عملدرآمد نہ ہو اور بانی پی ٹی آئی سے ملاقاتوں و ان کے علاج کے معاملات حل نہ کیے جائیں تو حالات کیسے بہتر ہوں گے؟ ایسی صورتحال میں پی ٹی آئی سے صرف احتجاج نہ کرنے کا مطالبہ کیسے کیا جا سکتا ہے؟

انہوں نے واضح کیا کہ جمہوری معاشروں میں بہتری صرف زبانی دعووں سے نہیں بلکہ عملی اقدامات سے آتی ہے، لہٰذا اگر ریاست سنجیدہ ہے تو وہ عملی اقدامات کرے تاکہ محسوس ہو کہ مطالبات پر پیش رفت ہو رہی ہے۔ چیئرمین پی ٹی آئی نے اعلان کیا کہ 27 ستمبر کا لانگ مارچ ان شاء اللہ ضرور ہوگا اور یہ مکمل طور پر پرامن رہے گا۔ انہوں نے کہا کہ تحریک انصاف اسلام آباد کی طرف آئے گی جہاں داخلے کے بعد میلے کا سماں ہوگا اور پرامن ماحول برقرار رکھا جائے گا۔ انہوں نے بانی چیئرمین کے خاندان کی خواتین اور کارکنوں کے خلاف کارروائیوں پر شدید تحفظات کا اظہار کرتے ہوئے ریاست سے اپنے اقدامات پر نظرثانی کا مطالبہ کیا اور کہا کہ انصاف نہ ملنے تک سیاسی جدوجہد جاری رہے گی۔